صحتي هي حياتي

حملة بسيطة جدا في تنفيذها ..ولكنها تحمل الكثير من المعاني في داخلها ..
فهي حملة هدفها عمل توعية للمجتمع في كثير من الامراض التي لا يعيرها الكثير بالاً ..

الحملة من فكرة وتنفيذ طلاب وطالبات جامعين ...وقد قررنا ان تكون في منطقة القطيف ...

تتمثل في عمل معرض صحي تثقيفي ..لمدة 5 ايام تقريبا .. 3 ايام نسائية ويومين للرجال ...

المعرض يتكون من عدة اركان .. كل ركن لمرض ..بالاضافة لركن المسابقات والكثير من الافكار المطروحة لجعل التعلم في المعرض اكثر متعة وسهولة ..

حقيقة قد فرحت عندما اكتشفت ان اطباء المستقبل .. يهتموا باحتياجات مجتمعهم .. وعلى اتم الاستعداد لسد الثغرات في صورة المرض امام المجتمع حتى تظهر واضحة .. ويتم القضاء عليه ..

الحملة تتناول امراض شائعة .. كالسكري والضغط وامراض الدم الوراثية ...وغيرها ..

واعتقد انها ستكون في نهاية شهر شعبان او بداية شهر رمضان .. على قسمين .. قسم نسائي وقسم رجالي ..

فعلاً انه واجب الطبيب في تخريج جيل على قدر عالي من الثقافة الصحية .. حتى نصل الى وضع امان نسبياً .. حيث ان انخراط المرضى بالمجتمع يتطلب من المجتمع ان يكون عن معرفة بحاجاتهم .. فعلى سبيل المثال .. اصابة مريض ربو بنوبة امامك شيء ليس بعيد الاحتمال ..فيجب ان تكون عن معرفة بسيطة على الاقل بالمرض ..حتى تساهم معانا في انقاذ حياة المحيطين بك ..

ان حياة الانسان من اثمن الاشياء في هذه الدنيا .. والحفاظ عليها واجب علينا ..كاطباء واباء وامهات وكمجتمع اسلامي مترابط ..حيث ان الاسلام شدد على الروابط الاخوية والتكاتف في المجتمع ..

ولاجل ذلك .. ندعوكم جميعا للمشاركة معانا في هذه الحملة .. بالعمل فيها او الدعم المادي او المعنوي ..او حتى الحضور اليها عندما تقام ..

واذا كنت من المهتمين بالمشاركة معانا ماعليك الا ان تراسلني .. لتسجيل اسمك ..

تحياتي ..

رئيسة ركن الربو وعضوة في لجنة العلاقات العامة واللجنة الاعلامية للحملة ...

جمانة المشيخص ...

يارا معي بالجامعة !!!!

اليوم ..لاني رحت الجامعة الظهر ..يارا بنت اختي لصقت فيني ..وقررت تروح معي الكلية ..على قولتها جامعتكم جميلة ..وطبعا لاني بحضر محاضرة وحدة وهي مراجعة ..قلت اوكي باخذها ..

واخذتها ..وياسبحان الله في 10 دقايق جهزت ومااستنحست كالعادة عشان تلبس ..

وركبنا في الباص ومعانا ..بنت ..كانت حيل حبوبة ..ولطيفة ..وسولفت معانا ..

وطبعا يارا كان باين عليها الملل ..لحد ماوصلنا الجامعة والطريف اللي صار ان طلاب الدراسات الفنية التابعة للقوات البحرية اللي جنب كليتنا ..كانوا طالعين ..بلبسهم الابيض ..ومع اني اروح الجامعة من 3 سنوات ..هذا اول مرة اشوفهم ..

ووصلنا الجامعة ..وطبعا من الباب ..البنات قالوا لي . ... هذي ياراااااا ..يالله كبرت ..وجمانة حيل حيل تشبه لك ..هههه

عرفتها على ناس كثير ..وقبل مانوصل مبنانا ..قالت لي ..الجو حااااار ...:( ...واول مادخلتها انبسطت وتقول لي جامعتكم حلوة ..!!! وقلت لها لاحد يسمعك ويقول ماعندك ذوق ..لوووووووول ..

وشافوها بنات صفوى على الدرج ..وقالوا اليها بياخذوا شون الخروف ..وجن جنونها ..صارت تخاف من البنات لايسرقوا الخروف ..وعرفتها على الشلة ..والبنات وسلمت عليهم بدون نفس طبعا .. خوفاً على الخروف ..لدرجة خبته في شنطيتي ..!!!!

وطبعا رحت شريت النوت ووديتها مكتب الدكتورة عشان تستأذن انها تحضر معي ..لانها لو ماوافقت ماكنت بدخلها ..المهم ..دكتورة منال ..المايكرو .. انبسطت عليها كثيرررررررررر ..وتقول لي هي احلى مني !!! مشكل ..كل واحد يعرف نفسه ..لووووول ..

المهم ..وهي تحضر المحاضرة ..شوي ترسم وشوي تخربش ..وفجاة طلعت الشبس الكبير حقها ..وتعلق عليها الدكتورة تقول شوفوا الاطفال المروقين ..اللي ياكلوا شبس .. هههههه ..والكل ضحك ..

طبعا في الرجعة نامت ..مع انها شوي كانت عبئ عليي ..بس صراحة انبسطت فيها ..

الله يخليك وتكبري وتصير عروسة ..

ملاحظة : الصورة في الباص ..في رجعتنا ..

تحياتي ..

جمانة المشيخص .. سيدة الصباح ..

دكاترة سنة ثالثة ...

ويش احكي او اخلي عن دكاترة سنة ثالثة في جامعة الملك فيصل ..
سنة متعبة بس ممتعة ..تحسي نفسك جد تدرسي طب ..
أبدا بالمواد الميجر ..
النيورو ساينس ..
د. بيبي كوتي .. صحيح صوتها نازل بس لو تركزي في المحاضرة تلقطي كم معلومة ..انسانة جدا متعاونة ومحترمة مع المحترم ..ونظرا لطول العشرة بينا وبينها ..كونها درستنا الانتومي والنيورو انتومي .. فهي غالبا مكونة خلفية عن كل طالبة ..
د. منى الشيخ .. نيورو فسيو ..انسانة فاهمة وتخلي المحاضرة حماس ..شخصيا لما احضر المحاضرة مو محتاجة اذاكر اصلا المحاضرات ..بس اللي مو حلو فيها ..انها تاخر المحاضرات واخر الترم ننزحم ..والمحاضرات مو حيل مرتبة ووفيها فوضى ..
د.لطفي ..ابو التتوريال ..وابو الفهم والمخمخة ..تحس معه انك فاهم وقادر تجيب درجات ..الكل يحبه ..
المايكرو بالوجي ..
د.منال .. انا شخصيا اموووووووووووووت فيها ..شرحها يدخل راسي مايطلع منه ..انسانة فاهمة جدا ..ورهيبة ..متعاونة وخدومة ..لها عبارات شهيرة مانساها .. مثل المايكرو فايج اللي على القهاوي .. ونبدأ المحاضرة من التريتمت احسن ..
د. اكرم .. علمنا فارما اللي تبع المايكرو . ماافك له شخصيا ولا كلمة ولا ادري ايش يقول ..بس انسان حيل هادي ..ويحب يأكد كلامه بآيات من القرأن ..
د.الزهراني .. شخصية خفيفة دم ..يحب يضحك ..ويحسسنا من جد ان الفاريولوجي ممتع ..صوته حيل نازل وانسان خجول ..ومتعاون ..
د.القرشي .. جانا بس في محاضرتين .. انسان حيل متدين ..وباين عليه ..يقولوا انه زوج دكتورة سهير ..شرحه حلو لابأس به ..ومتعاون ..حذف الينا جزيئته بالمد ..
الباثو .. عقد الشعب ..
درسونا ناس كثير ..بس كل شخص له بصمة خاصة ..اولهم ..
د. االصويان .. وهل يخف االقمر .. دكتور يحب يضحك ومايحب المحاضرة جد ..بس شرحه حلو والمعلومات تثبت ..اسئلته مو حيل صعبة ..درسنا بداية السنة وخدم معانا نهاية السنة ..ويقول انه بيتقاعد ..صار لي موقف معه مع اسمي ..ماينسى ..ذكروني واحكيه اليكم بعدين ..
د.أيمان الشيخ ..علمتنا هماتو .. انسانة فاهمة بس نوتها بس رؤوس اقلام ..بس شرحها حلو ..وقد ماتسالي تعطيك معلومات ..بس اسئلتها حريقة ..وتحب المادة حيل كلنكل ..
د.مرغني .. علمنا بعد هماتو .. هااااااااااااااادي جد ..ومايبتسم ابدا ..حضرت له محاضرتين الظاهر بس ..صوته بارد ويتكلم ببطئ ..بس تحسه فاهم ..
د.عادل المنتصر .. علمنا اورام ..هادي ..مايضحك المحاضرة معه جد ..تحسيه حيل فاهم ويش قاعد يقول ..واسئلته زينة ..
د.الشواربي .. كل معصب ويشرح بصوت عالي ..بس طيب ..والواحد المحترم بسهولة يكتسبه .. صار لي موقف معه ..وحيل انحرجت ..ذكروني وبقوله ..
د.عائشة .. جديدة .. اول دفعة تعلمنا احنا ..حيل متفانية ..وتعيد الشرح مرتين ..بس ماحد يحضر لها ..لانها ماتقدر تمسك الكلاس والكل يهدر ويرد على الجوال ..باختصار الكلاس حفلة ..شخصيا لو حضرت اليها وركزت افهم كثير ..
وفيه دكتور نسيت اسمه .. علمنا نص ساعة بس ...وكنت اقول لصاحباتي انه اوسم دكتور مر علينا في سنة ثالثة وكانوا يضحكوا ..
الحين نجي للمواد المتوسطة ..
الفامكو .. ماادري ليش ماحد يحب هالمادة .. انا شخصيا احبها واحس تجيب فيها درجات حتى لو ماذاكرت ..
د.منال .. علمتنا ..التغدية كلها ..انسانة فاهمة وراقية في تعاملها ..انبسط في مناقشتها ..
د.سهير .. علمتنا الابيدميلوجي في بداية المنهج والحسابات .. مااحب اعلق عليها كثير بس هي زوجة الدكتور القرشي ..وتحب المشاركة في المحاضرات ..ولازم تتفاعل معاها ..
طبعا هالدبارتمت خبره معانا ..من سنة ثانية ..
د.برفين .. والله مااذكر علمتنا او لا هالسنة ..بس انسانة جد معجبة بتخصصها واطبقه بطريقة رهيبة ..تحببك في المادة
د.عمر .. علمنا الباننج فور هلث اديكيشن ..كان حيل مكتئب لان البرجكتر مااشتغل ..واضطر يشرح اللي يذكره ..بس اسئلته حيل مباشرة ..
د.نسيت اسمه بس هو علمنا .. دكتور بيشنت رليشن شب .. ومحاضرة ثانية ..كان حيل هادي ومحاضرته كانت حلوة
د. أمينة .. مااحب اعلق كثير ..بس لمزيد من التفاصيل ..راجع مقالة محاضرة الفامكو مع د.سليمان ..
الفارما ...مادة حلوة بس تعذب .. وسريعة التتطاير ..
درسونا .. 3 دكتورات بس فيه 3 دكاترة زيادة ذاكرت نوتهم ..
د.منال العالم .. انا احبها شخصيا لانها مسئولة النشاط في الجامعة ولي احتكاك رهيب فيها ..انسانة جدا فاهمة نخصصها .وتحببك فيه وتعرف انك مو كمبيوتر ولاتحفظ كل شي ..
د.سومان .. ماافهم اليها ولا كلمة ..وتتكلم بصوت واطي .. ومحاضراتها دش ...بشكل يكرهك في عيشتك ..بس هي كشخصية حبوبة ..وبيني وبينكم الفارما مادة دفشة ماحد قال حليوة ..فهي ماتحاول تجملها ..تعطيك اياها مثل ماهي ..
د. اماني ..احبها لانها فاهمة ..بس مااحب طريقة نطقها للانجليزي .."الاكسن" حقتها ..ماافكها ..بس عموما محاضراتها حلوة ..وفي الاب تفهمك صح ..
طبعا الدكاترة اللي ذاكرت نوتهم ..
د.خواجة .. نوتته رهيبة ويقولوا حيل طيب ..وبيني وبينكم ابي اشوفه ..احسه حيل فاهم ..اذا نوتته تفهم كذا .. اجل كيف شرحه ..
د. أكرم .. نوتته زينة ..صحيح زحمة بس الاسئلة تجي منها ..
كان فيه واحد ثالث وانا نسيتها ..!!!
المواد الخفيفة ..
البارا ..حبيب الدرديري ..حيل متعاون وكلمته سيف ..ومايحب يظلم احد ..لما قلنا له انت ماشرحت هالجزء حذف الاسئلة ..بس بسرعة يعصب ..ويزعل ..مايحب الدخلة والطلعة في محاضرته ..
الاميون .. الكثيرون يقولوا لك احسن دكتور مر عليهم في حياته ..د.عبيد ..هالدكتور متفاني جد في عمله ..يشرح بضمير وحيل مرتب ..ويمشي مثل الساعة ..والاميون معه حلو ..بس اسئلته صعبه ..
السايكو .. مادة تجيب الهم .. بسبب بعض دكاترتها ..وهم 3 ..
د.محمد خليل ..والله صرت احبه من اللي شفته ..انسان يتكلم ببرود ..وهادي .. ممكن يضحك بس لازم تكون النكتة قوية ..فجاة يسكت كذا في نص الكلام ..يحسسك كانه مرتاب فيك ..ومايحب النقاش كثير ..
د.عبد العزيز .. انسان المحاضرة معه تفاعلية ..يحب النقاش ..وتفهمي معه عدل واسئلته حلوة ..تحسي معه من جد انك تدرسي سايكو ..
د.معن ..المحاضرة والشرح والاسئلة في جهات مختلفة ومايقربوا لبعض ..لدرجة تشكك احيانا انك تدرس سايكو ..من آرائه المميزة ان احنا مفروض مانتحيز الى جنس على حساب الاخر ..فمانقدر نقول المراة في جانب احسن من الرجل او العكس ..اثنينهم متساويين !!!كل هذا عشان قلت له المراة ملتي تاكسس والرجل يوني تاكسس ..شب فيني ..

ادعوا لي اطلع من هالسنة ..
تحياتي ..
جمانة المشيخص .. سيدة الصباح ..

ذكريات مؤتمر السرطان الثالث

المؤتمر كان طبعا في ابريل 2009 ..
هذا المؤتمر سمعت عنه عن طريق اسراء وسجلت فيه .. وتوقعته بيمر عادي ..لحد مارحت الميتنق ..في الخبر في مقر الجمعية ..وشفت ناس كثير اعرفهم ..اولهم رئيس اللجنة اللي بشتغل فيها .. د.عدنان ..ومن ينسى دكتور عدنان صاحب النصيحة الشهيرة الينا في التدريب ..الجراحة لاحقين عليها ..خليك في المدسن وكيف تاخذ هستري ..وطبعا كان من الانترن تحت يد د.عبد الله الراشد ..اللي كان يدربني في كل صيف ..وذكرت دكتور عدنان عشان شغلتين .. اولهم اني سويت انا وكمال محاضرة عن السكلسل ..وسوينا اليها مطوية بس بالعربي لان طلاب سنة اولى كانوا كثار ومابي اعقد حياتهم ..وقال لي ليه بالعربي ..وقلت له السبب ومااقتنع ..والسبب الثاني انه شرح لي ..DVT
وكان شرحه رهيب لدرجة حتى في الباثو السنة لما اخذت الاديمه ذكرته ..واول مادخلت الميتنق من هول الصدمة انحسب لساني مااعرفت ارد لاني اقول في بالي هذا د.عدنان ماغيره ..وهناك شفت ناس كثير اعرفهم اهم حلوات 208 .. اللي كنت اعرف اغلبهم ..واعرف رشا بعد من 206 .. وطبعا ناهيك عن بنات 207 اللي معي بالدفعة ..
ويوم الشغل ..طبعا طلبت من فراس يوصلني ..ووصلت على الموعد ..واخذت موقعي اول شي كنا حيل مو عارفين نتصرف مع الجنس الاخر ..وصدمة الموضوع ..لكن سويت لنفسي تجربة رهيبة ..شفت ولد تايه هو وصاحبه ..ورحت كذا اقوله محتاج مساعدة ؟؟ واستغرب من نفسي وطبعا لازم ماابي اني مرتبكة ولو تلون وجهي احمر بننتحر ..وعديت الاختبار بنجاح ..وصرت عادي ..مااستحي واي احد يبي اي شي اسويه بسهولة وبدون حواجز ..ووقف مع يزيد ..طبعا ماتكلمنا ابدا ..لحد ماهو فتح الحوار وقال لي ماشاء الله عليك .. ماتعبتي ؟ ! .. قلت له انا مسئولة لجنة الرياضة بالجامعة مافيني اتعب وثانيا انا كابتن فريق السلة والعب سبورت دايما ..وجلسنا نسولف انا وهو كلمني عن جامعة ..البترول والمعادن ..وكلمته عن الفيصل .. ويقول لي ان طلاب الطب محتلين الجمعية ..وضحكت واقوله لان حياتهم كلها كذا ..قال لي عندكم مستقبلا حياة اكشن ..اقوله صراحة اكيد ..وقلت لها مواقف صارت لي في التدريب ..
وبعدين تعرفت على ناس كثير في اليوم الاول ..في الايام الثاني ..اختلف شغلنا لان كل الناس دلت البوابة ..وماحد محتاج ادليه ..فصرنا شبه فاضيين ونهيت من مكان لمكان ..وجلسنا نرسم على اللوحة وهناك تعرفت على محمد ضاحي ..هالولد حفلة .. من جد ..
اليوم اللي قبله اكيد شفته وصار بينا احتكاك خفيف ..بس قال لي القاعدة مليانة لاتجيبي الينا ناس ..وصار كذا موقف ماابي اكتبه عادي ..كان ..
واليوم اللي بعده علق على مفكرتي الالكترونية ..ولما قلت اليها السعر انفجع ..واستغرب من لهجتي ..لما قلت اليها من القطيف ..يقول لي بالله ؟!! .. مو معقول ..لهجتك مثل بنات الخبر بالضبط ..قلت اليه بس انا من القطيف وعايشة هناك طول عمري ..المهم قال لي هنا ازعاج تعالي بره نكمل الكلام ..وسولفنا وتمشينا ..وطبعا من المواقف الحلوة ..اني شفت دكتور غازي القصيبي وتصورت معه ..وسوينا نقاش حاد مع دكتور عدنان على التدخين اللي يارب يترك التدخين قبل مايضره ..
انا ورشا بكروت التدخين سوينا العجايب ..هههههه ..وتناقش مع زينب على سالفة سمبثي نت امبرثي ..واقول اليها صعب مااحس ومااصير مثل الجدار مع المرضى ,,, تقول لي لازم ..
طبعا كل البنات والشباب اللي كلمتهم مباشرة او ماكلمتهم لهم مكانه في قلبي .. كانوا يومين رهيبين وانبسطت كثير وتعرف على اصحاب جدد ..وناس معي بالجامعة اولاد وبنات وناس من جامعات ثانية ..
واتمنى اشوفهم في اقرب فرصة ..طبعا فيه كثير مواقف صارت بس لاني كتبت هالمقال متاخر ..موعارفة اصغيها ..وطبعا الصور كفيله بشرح الباقي ..
الصور موجودة في الفيس بوك حقي ..:)
تحياتي .. جمانة المشيخص ...

محاضرة الفامكو مع د\ سليمان

في يوم الثلاثاء قبل الماضي .. ماجات دكتورتنا الفامكو .. جاناا دكتور الاولاد اللي طول عمرنا نحسد الاولاد عليه وياريته ماجا ..
اول شي خليني اعرفكم على دكتورتنا :
د.جنيف .. دكتورتنا تعلمنا ساعتين متواصلين ..نص ساعة تتاخر فيها ..ونص ساعة تمجد نفسها ..ونص ساعة تهزئنا وتقول الينا .."المتريل خسارة فيكم " ونص ساعة تشرح الينا شي هي مو فاهمته ..تخيل دكتوره اقول اليها نسب وتناسب ماتعرف يعني ايش ؟ !! وهي مفروض تعلمنا بايو ستات .. ومن كثر ماازهقها بالمحاضرات قامت قالت لي .. ترى هالعلم موضوع من زمان ومو انتي اللي تغيريه ..طلعت على وجهي علامات الواثق من نفسه ..اكيد ولو ..مع نظريات الماث اللي سويتها ..مااتقبل هكذا عبارة لو بالموت ..انا ضد هالكلام ..وقلت نهاية السنة بطبع اليها نظريات وبهديهم اليها هدية .. :D
واتوقع الصدمة حقتها .. طبعا هالمادة من كثر ماتحبطني لانها ماتعرف تشرح ماث وانا ماارضى على الماث اتضطر مااحضر ..لاني لو حضرت احتمال كبير ارتكب في احد جريمة او اسوي في نفسي شي ..فحفاظ على الشعب مااحضر ..
والحين اعرفكم على دكتور الاولاد :
د.سليمان .. طبعا مايعلمنا بس توصلنا نوته .. طبعا نوته مرتبة بشكل كبير وما طلعت الاسئلة منها ..بالاضافة انه جانا في الاختبار عشان يجاوب على اسئلتنا ..وكان انسان فاهم وعاقل وماخفي كان اعظم ..
المهم لما غابت دكتورتنا اللي تقعد نص ساعة تقول الينا ان مفروض نحمد ربنا انها تعلمنا ..وانها جايه من جنيف مخصوص عشان تعلمنا ..وان طيارتها تنتظرها ..وطبعا انا مااقدر مااضحك .. وجانا دكتور سليمان اللي انا كنت اظنه ملاك الماث الحارس ..طلعت المصايب ..طلعت المحاضرة مملة اكثر ..الدكتور اعظم من الدكتورة والضحية احنا دفعة 207 ..من عذر انا مااحضر المحاضرات واجيب درجات ..اتاري السالفة سلف استدي ..
المهم .. سوينا في المحاضرة اللي ماصار ولا استوا ..فيه ناس وهذول الدوافير ذاكروا نيورو قدام الدكتور ..وفيه ناس مثلي ومثل شلتي ..جلسنا ننكت وضحك ..لدرجة جمانة الحداد رسمت يدها مثل الاطفال وناقص تزخرفها ..وليلى تحاول جاهدة تركز بس مو فايد ..لانه يقول ببساطة اشياء مو مفهومه ..ومريم جالسة ورانا ..في عالم ثاني ..وانا في نص الشلة واضحكهم ..وطبعا وصلت الى قمة الضحك لما قال الينا الدكتور هالعبارة " لو سويتي نظرية وطلعت خاطئة وقبلتيها فانتي اخذتي قرار خاطئ ولو طلعت صحيحة ورفضتيها بتكوني سويتي قرار خاطئ " في ذمته وصلت سنة ثالثة طب مااعرف هالشي كيف ؟!! ..ومحتاج يقوله واللي قتلني ضحك لما عكس العبارة " لو سويتي نظرية وطلعت صحيحة وقبلتيها فانتي اخذتي قرار صحيح ولو طلعت غلط ورفضتيها فانتي اخذتي القرار الصحيح " يعني بالله .. مخي الى هالدرجة واقف لدرجة مااقدر اعكس العباراة ؟!!!
طبعا انا حضرت محاضرة وحدة في البريك بينهم ..رجعت بيتنا احسن لي ..لاني لو جلست زيادة كنت يمكن اتركب جريمة ..
بس طلعنا باستنتاج واحد بس.. احنا حالنا افضل من حال الاولاد بكثير ..ويامسكينة يا 207 ..
من ذكرياتي .. ماابي لما اكبر واتخرج ..مايكون عندي شي اقراه واذكر كلاسات الجامعة J
الله يخليكم لي ياشلتي ..
اهداء خاص الى جمانة الحداد وليلى ومريم ..
تحياتي ..

جمانة المشيخص – سيدة الصباح

مؤتمر المضاعفات المزمنة لمرض السكري ...

شكله بيكون وناسة ...بس المشكلة أنه في ويك أند كوز الباثو ...:( ..بشوف وان شاء الله خير وأقدر أروح ..

ملاحظة : وضعته هنا عشان كل الاشخاص اللي عندي على الايميل والفيس بوك يعرفوا عنه ولاحد يقول ماقلت له ..:P..

تحياتي ..

الحب الحقيقي ... موضوع هز في داخلي الحقيقة !!!

وصلتني هذا العبارات على ايميلي ...

------------------------------------

قد تتمنى أنك لم تعرف شخصاً مآ !
ليس لأنه آلمك !! بل لأنه آسعدك لـحد آلألم !

من جن بالحب فهو عاقل ومن جن بغيره فهو مجنون


: حبـيــبـان

فتاة سألت شاب إذا هي جميلة فقال : لا
سألته إذا يرغب ببقائها معه للأبد فقال : لا
ثم سألته إذا كان سوف يبكي إن رحلت بعيدا ًمرة ثانية
قال : لا

فسمعت كثيرا ًواضطرت للرحيل وهي ترحل بعيداً, أمسك بذراعها وأخبرها أن تبقى



وقال : أنتِِ لست جميلة ... أنتِ رائعة

أنا لا أريد البقاء معك للابد ... أنا بحاجة أن تبقي معي للأبد

أنا لن أبكِي إن رحلتي بعيداً ... أنا سوف أمــوت ...





.. الحب الحقيقي
حبيبان .. في طريق مهجورة على الدراجة النارية بسرعة تزيد عن 100 ميل بالساعة

الفتاة : أبطئ السرعة , نحن نسير بسرعة كبيرة
أنا خائفة ولا أريد أن يحدث شيء

الشاب : هيا .. لا تخافي , أنا أعرف ماذا أفعل
. أنتِ تشعرين بالسعادة صحيح


الفتاة : لا .. لا .. أرجوك توقف أنا فعلاً خائفة


الشاب : إذا أخبريني أنك تحبيني

الفتاة : أنا أحبك

الشآب :أرجوكِ عانقيني

* الفتاة تـعـــــــــــــــــــــــــــــــــــانـق الشاب *


الشاب : هل تساعديني؟ وتأخذي خوذتي من رأسي وتضعيها على رأسك
.. إنها تزعجني

في صحيفة اليوم الثاني : دراجة نارية تحطمت في مبنى لتعطل الفرامل

ًالعثور على شخصين , لكن لم يبقى على قيد الحياة إلا شخصا



الحقيقة هي : أنه في منتصف الطريق لاحظ الشاب أن الفرامل معطلة
لكن لم يريد أن تعلم الفتاة بهذا
بدلاً من ذلك جعلها تعترف بحبها له ومعانقته للمرة الاخيرة


ثم ألبسها خوذته كي تعيش

"الفراغات بين أصابعك موجودة لأن هناك شخص آخر يمكنه أن يملؤها"


الحب ليس العثور على إنسان مثالي , لكن أن نرى الشخص الناقص مثالي

هل تسألت يوما
أيهما يؤلم أكثر: أن تقول شيئاً وتتمنى أن لا تقوله , أو لا تقول شي وتتمنى لو قلته ؟ ؟؟!>>>حقيقة هذا العبارة قتلتني لاني كثيراً ما امر بهكذا موقف ...




تستغرق دقيقة لتحطم شخص ما

ساعة لتعجب بشخص ما

ويوم لتحب شخص ما


لكن تستغرق العمر كله لتنسى شخص ما ..

------------------------------------

الحب ..كثيرون يقولوا أنه هبة ..وكثيرون يقولوا بانه لعنة ..ولكني متأكدة بأن من يجد الحب الحقيقي في حياته فهو محظوظ ..

ليس الحب بالمال ... وليس الحب بالحاجة ... الحب هو تكامل رائع .. ان تشعر ببساطة بأن هذا الشخص يكفيك من هذه الدنيا ...

شعور بالامان ..في اخطر المواقف ..

التضحية والقبول والرضا بالأخر .. الأمل في غد أفضل ..أن تكون متأكد بأن حبيبك ليس أفضل شخص بالعالم ولكنه أكثر شخص تحبه بالعالم ..

الحب .. شيء حقيقة لااستطيع تعريفه ...لانه مفهوم لكل كل منا وفي قلب كل منا ..ولكنه ..يأبى أحياناً ..أن يخرج للعلن ..

نصيحة انصحها لكل من يحب في هذه الحياة ..الحب ليس شيء يسهل أن تقتله ..فلا تحاول ذلك ..وأن كانت متأكد من مشاعرك فقاتل لاجلها ...

قال الامام علي عليه السلام : ( عجباً لشخص يحب ولا يُحب )

أي أنه ان كان حبك فعلاً صادقاً ..لامصلحته فيه ..فسيصل لقلب محبوبك بسهولة ..ليخفق قلبه بحبك ..

تحياتي ..

سيدة الصباح ..

جمانة المشيخص ...

درس لااتعلمه .!

"الحياة مدرسة" ...عبارة كثيرا مانسمعها ..والدروس قاسية ..والتجارب اقسى ..والتقييم مستمر ..لدرجة تنسيك رهبة الاختبار..

لكثرة مادخلته من اختبارات ...

ولكن ان من اهم الاشياء التي تصعب الحياة ... هي النفس البشرية ...أجل النفس البشرية ... بحساسيتها المفرطة ..وانكسرها مع كل خيبة امل ..

ألم نحبط بما فيه الكفاية ليموت كل شعور فينا بالاحباط ؟؟

ألم نخذل بما فيه الكفاية ..لنصدق بعبارة "كل شي معقووووووووول !!!! " ؟!؟

ألم نفهم خطأ بما فيه الكفاية ... لنقرر عدم التحرك حتى لاتصدر منا افعال ..يقرر مصيرها أن تفهم بشكل حسن او سيئ ؟؟

ألم نصدم بما فيه الكفاية ليموت هذا القلب النابض فينا ؟؟

مازلت مستغربة من قلبي ..فهو مازال ينبض بعد كل ماجار !!!

كل هذا الصدمات والمشاكل ..والاحباط والأسى ..حتى أن في أيام وضع قاعدة حمقاء ..

"لاتضحكي " لاعتقادي الراسخة دلك الايام بأنه بعد كل ضحكة اضحكها ستنفجر مشكلة تبكيني ..اضعاف الضحكة ...اصبحت كلما ضحكت أقول : "الله يستر ويش بيصير اليوم " ...

ولكني لاتعلم الدرس أبدا ..مازالت اثق بالناس وأحب وأصاحب أناس جدد ..وأَضحك!!!!

متى أغطي نفسي بشكل جيد يمنع عني كل الجراح والاذى .. متى أتوقف عن التوقعات وحسن الظن بالاخرين .. وأفتراض الخير بشكل دائم ...!!!

متى اتعلم الدرس ..!!؟؟
في الحياة

سيدة الصباح ..

جمانة المشيخص ..