من قلب الاختبارات... أفضفض
نظراً لكوني لم اكتب في مدونتي منذ فترة لحلول الاختبارات .. ولكوني اليوم في الباص ولاشيء لدي لاعمله ..ولااعتقد اني سأنام ... قررت ان افضفض لكم قليلاً ... لقد اختبرت الى الان اختبارين .. الباراساتيلوجي والباثو لوجي ..
البارا كان حلو (ترى زهقت وانا اكتب فصحى ) ..كان من جد يستاهل التعب .. على قد ماتعبت فيه ..جبت ..وان شاء الله بجيب فيه درجة حلوة ..
نجي للهم الكبير الباثو .. اختبرت امس نظري واليوم عملي .. طبعا النظري كان كويس .. طبعا المشكلة مو في الاسئلة ولا في المدة ولا في الكمية (مع انهم كلهم مصايب) المشكلة انك ماتعرف هل لو حليت كويس بيتصحح لك كويس او لا ..!!؟؟!
النظري .. كان لابس فيه ..والامل والعشم في اني اعدي معتمدة على الله ثم عليه .. اما العملي فكان فيلم .. تقدر تقول حفلة ..
في دقيقتين تعرف على الصورتين واوصفهم واكتب تشخيص واكتب مكانزم حق دزيز !!!! ..لاحظ كل هذا في دقيقتين وانت مفروض مذاكر المنهج كله في يوم واحد .. والكل مو نايم ..وانا مو مخلصة شي يذكر من الجزيئة ..وخلاص جاتني ازمة الربو من الخوف ..المهم ..وانا احل جاتني حاله هستريه ..شوي .. جاتني الضحكة وابي اصيح بعد .. ماابي اعيد في الباثو او اخذ رسست فيه ... ماابي اقضي اجازة الصيف برفقته ..مع اني كذا او كذا يمكن اخذ الفارما في الصيف ..بس ولا الباثو ...
المهم .. زفت شووي في الاب ... اي شوي >_<" .. الا واااااااجد .. وكان املي في الجارز خصوصا اني عليهم 10 درجات ..المهم امس النت كان مخرف عندي ..ومانزلت الصور الجديدة ..ودرست بس القديمة ..المهم ..جلست مع مريوم اذاكر وليلى تتعلق علينا ...وجالسة اذاكر الا يقولوا اول 22 بنت يدخلوا ..طبعا كون اسمي جمانة >_<" توقعت اني اسمي متاخر لان ترتيبي بالانجليزي شوي متاخر وقبل حروف مهمة مثل
A,E, F
يعني .. المهم ..او اذا بالرقم الجامعي ..فرقمي الجامعي شوي بعيد ..الا الترتيب ابجدي عربي ..>_<" ..
واطلع اخر بنت في اول قروب ..<<< من قرادة الحظ لان ..
ماابي ادخل ..ومافيه احد بيبدل معي ..والا يقولوا جمانة وجمانة ..ونقول اي وحدة ..لان احنا 3 .. انا وصاحبتي الحداد ..وجمانة الشيخ ..
الا اطلع انا وجمانة الشيخ ..وانا اقول لجمانوه .. حرام برسب بحمل المادة خلاص
(نظراً لكون توزيع الدرجات في هالمدة فن مو طبيعي .. الترم الاول كله 30 والثاني 60 .)
المهم .. قبل ماادخل حسيت بتجيني ازمة الربو .. وفيني الصيحة خلاص ..دخلت واناا اقول يارب مالي غيرك ..الا
ادخل واقعد على اخر كرسي ..وفيني الصيحة بقوة .. واقول لصحاباتي ..ادعوا لي .. المهم ..وانا متكئبة وهم يعطونا تعليمات الاختبار.. الا اشوف اول عينة صاحبتي قالتها لي ..لان انا لحقت اذاكر 17 من اصلا 36 ..ابتسمت وحليتها ..
واللي بعدها بعد شرحتها ...واللي بعدها انا اعرفها ..واللي بعدها شفتها في الصور القديمة .. وهكذا الحال .. وكانت النتيجة حلوة .. 9 من 10 .. ولا ال10 عرفتها بس انا غيرت الجواب في اخر لحظة ..:(
وتعلمت من هاليوم درس .. سوي اللي عليك ومن جد ربك مايخيبك .. ربي خلاني مع اول قروب ..وعطاني المجموعة السهلة وانا حتى مااخترت الكرسي لنفسي ..ربي رتب لي كل شي ووفر عليي ساعة زيادة اقعد اذاكر واتعب زيادة وانا نوم مانمت ..
ياربي اي قد أحبك ...واي قد انت كريم عليي ومن جد ماتخيبني ..
الحمد لله والف حمد وشكر ..
والحين وقفتي مع الفارما .. ادعوا لي ..
تحياتي ..
سيدة الصباح...
